Semana Blanca
Una temporada más, la Conseyería de Cultura, Política Llingüística y Deporte, al traviés de la Dirección Xeneral d′Actividá Física y Deporte, collabora na campaña Selmana Blanca d′Esquí pa escolinos, a celebrar na Estación Ivernal y de Monte Valgrande-Payares y na Estación Ivernal Fontes d′Iviernu, pa tola temporada d′iviernu 2024/2025.
Oxetivos
Tien como mira principal fomentar el deporte blancu ente los escolares del Principáu d’Asturies, y averar el monte y el mediu natural a tola nuestra rapacería, independientemente del so allugamientu xeográficu. La práctica deportiva nun ambiente distintu del avezáu, la convivencia coles compañeres y compañeros nel monte y el contactu intensu cola naturaleza son instrumentos educativos de munchu valir pa la formación de la nuestra mocedá.
Centru y alumnáu participante
Na Selmana Blanca va poder participar l’alumnáu d’Educación Primaria y Secundaria perteneciente a los centros escolares públicos y concertaos del Principáu d’Asturies, amás de les escueles d’Educación Especial. Nun s’establez un númberu determináu de participantes p’acoyese a la campaña, pero va tar condicionáu poles capacidaes máximes de los establecimientos participantes na campaña en cada estación.
Servicios incluyíos nel programa
Formatu ensin agospedamientu
- Cursín de trés hores diaries d’esquí o snowboard con técnicos deportivos titulaos y evaluación final de nivel. Posibilidá de contratar hores adicionales (consultar coles escueles d’esquí).
- Arriendu d’equipu d’esquí o snowboard (esquís y bastones/tabla de snowboard y cascu).
- Forfait gratuitu (accesu ilimitáu a los remontes en funcionamientu pa tola xornada).
- Petu identificativu pa les clases.
- Diploma
Formatu con agospedamientu:
A los servicios incluyíos n’apartáu anterior añádese l’agospedamientu en réxime de pensión completa o media pensión (esti últimu formatu namás pa los grupos que nun s’agospeden a pie de pistes, que comen na Cafetería de Fontes d’Iviernu, o nes Cafeteríes Telesilla o Cueto Negro, contratándolo enantes nel casu de Valgrande-Payares).
Existe la posibilidá de contratar de manera opcional monitores de tiempu llibre titulaos p’acompañar al grupu a lo llargo de la so estancia. Consultar condiciones y tarifes al tiempu de formalizar la reserva d’agospedamientu.
En Fontes d’Iviernu ufiértase la posibilidá d’acutar visita guiada al Centru d’Interpretación Vía Carisa.
Feches nes que se desenvuelve
El programa desenvuélvese del 10 d’avientu del 2024 al 20 d’abril del 2025, siempre que les condiciones dexen.
Duración
El programa de Selmana Blanca pue tener una duración de 1, 2, 3, 4 ó 5 díes, yá seyan de temporada alta o baxa.
Plazu d’inscripción
Del 1 al 31 d’ochobre del 2024. Fuera d’esti plazu van almitise solicitúes namás pa les feches nes que tolos servicios implicaos na actividá nun algamaren el tope de les places.
Más información
Nesti enllaz: semanablanca.fuentesdeinvierno.com.
Tamién se pue descargar el programa Semana Blanca nesti pdf: Selmana Blanca 2024/2025.