Lloviendo
Semana Blanca
Un añu más la Conseyería de Cultura, Política Llingüística y Turismu, per aciu de la Dirección Xeneral de Deporte, collabora cola campaña Selmana Blanca d’Esquí pa escolares, pa cellebrase na Estación Ivernal y de Montaña Valgrande-Payares y na Estación Ivernal La Fuente d’ Invierno, en tola temporada d’iviernu 2022/2023.
La Selmana Blanca tien como principal oxetivu fomentar el deporte blancu ente los escolares del Principáu d’Asturies y averar el monte y el mediu natural a los nuestros xóvenes, independientemente de la so ubicación xeográfica. La práctica deportiva nun ambiente distintu al que se tien davezu, la convivencia con los compañeros nel monte, y el contactu intensu cola naturaleza, son instrumentos educativos de gran valir pa la formación de los nuestros xóvenes.
Na Selmana Blanca van poder participar los alumnos d’Educación Primaria y Secundaria pertenecientes a los centros escolares públicos y concertaos del Principáu d’Asturies. El númberu ideal de participantes por escuela ye de 20 alumnos; queda condicionáu’l númberu total de places nesta promoción a la capacidá d’ocupación de cada estación.
La Selmana Blanca incluye estos servicios y pel periodu contratáu:
- Agospedamientu en réxime de pensión completa o media pensión (esti últimu casu namás pa los grupos non agospedaos a pie de pistes, que van realizar la comida na cafetería de la Estación de Fontes d’Iviernu, a pie de pistes).
- Arriendu d’equipu d’esquí o snowboard (esquís, snowboard, botes, bastones y cascu).
- Trés hores diaries de clases d’esquí alpín o snowboard, con técnicos deportivos y titulaos y evaluación final de nivel. Posibilidá de contratar hores de clas adicionales (consultar coles Escueles d’Esquí).
- Accesos illimitaos a los remontes en funcionamientu (forfait gratuitu).
- Petu identificativu pal desenvolvimientu de les clases.
- Entrega de diplomes a tolos participantes.
- Valgrande-Payares ufierta opcionalmente serviciu d’acompañamientu y animación les 24 hores de los díes d’estancia, con monitores titulaos de tiempu llibre.
- Fontes d’Iviernu ufierta tamién la posibilidá de contratar monitores de tiempu llibre p’acompañamientu del grupu, amás de visites al Centru d’Interpretación Vía Carisa previa reserva.
El programa de Selmana Blanca va poder tener una duración de 1, 2, 3, 4 ó 5 díes. Amás, estos díes puen garrar inclusive díes de fin de selmana.
El centru escolar ha alcordar la so reserva d’actividá directamente colos establecimientos implicaos: agospéu, escuela d’esquí, arriendu de material y posibles servicios complementarios (serviciu d’acompañamientu, monitores de tiempu llibre...) o, nel so casu, al traviés del representante de tolos servicios.
El centru escolar ha formular la solicitú de gratuidá del forfait al traviés de la páxina web de la Estación onde tea interesáu en desenvolver l’actividá, con polo menos 15 díes d’antelación a la fecha na que se cuntare empezar la so actividá. Les Estaciones van revisar que les solicitúes cumplen colos criterios establecíos y van unviar el preste de la concesión de gratuidá al traviés d’e-mail. El centru escolar ha presentar el documentu acreitando la concesión de gratuidá de la que retire los forfaits nes oficines de la Estación. El día de la recoyida de los forfaits va comprobase que’l númberu real d’alumnos y profesores correspuéndese colos datos indicaos na solicitú. Un númberu inferior de participantes al respective del solicitáu nun va suponer nenguna compensación económica o d’otru tipu de la cantidá de forfaits non usaos. El non usu de dalgún de los servicios incluyíos nel programa de Selmana Santa (forfait, clases o arriendu), nun va suponer compensación nin descuentu nes tarifes vixentes.
El plazu d’inscripción va empezar a partir del 17 d'ochobre del 2022.
El programa va desenvolvese del 12 d’avientu del 2022 al 9 d’abril del 2023, siempre que les condiciones meteorolóxiques dexen.
Más información nesti enllaz: Selmana Blanca d’Esquí pa escolinos. Tamién se puede descargar tola información nesti pdf: Selmana Blanca 2022/2023.
